Ish-polici i burgjeve, Gentian Bejtja, që u ekzekutua këtë të premte në oborrin e banesës së tij nga një breshëri plumbash kallashnikovi është person me precedentë të theksuar kriminalë. Ky ishte atentati i katërt ndaj 44-vjeçarit Gentian Bejtja. Në 2016-n atij i vendosën një sasi tritoli në automjet. Nga shpërthimi ai u plagos, por u mbijetoi plagëve. Më 9 janar 2022 Bejtja i shpëtoi një atentati me kallashnikov, po në zonën e Niklës, ku mbeti i plagosu lehtë në krah. Ai shoqërohej nga 31-vjeçari, Klodian Stafuka, që ndodhej në të njëjtën makinë me të. Atentati në atë kohë ndodhi në një pikë karburanti, ku kishin ndaluar për të furnizuar mjetin. Në 4 korrik të vitit të kaluar, ndaj Gentian Bejtjas u organizua një tjetër atentat, ku viktimë mbeti kunati i tij, Ramazan Sino, ndërsa u plagosën edhe dy fëmijët e mitur të Gentian Bejtjës. Për të treja rastet, policia ka shoqëruar dhjetëra persona, por asnjëherë nuk ka siguruar provat e nevojshme për të zbuluar autorësinë.