Presidenti i Republikës, Bajram Begaj përmes një shkrese drejtuar kryeparlamentares Elisa Spiropali dhe komisioneve të ligjeve dhe ekonomisë, kërkon një reagim të fortë për skandalin me mikrokreditë. Kreu i shtetit, pas komunikimit institucional dhe informimit nga Banka e Shqipërisë dhe Ministria e Drejtësisë, vendosi në dijeni kuvendin për gjetjet e deritanishme dhe kërkoi një reagim prej tij. “Përhapja në një masë të madhe njerëzish dhe për një kohë relativisht të gjatë e kësaj skeme abuzimi ka krijuar hapësira për të hedhur dyshimin se sistemet mbikëqyrëse nuk kanë funksionuar apo që janë penguar me dashje të funksionojnë.” – shkruan Begaj në letrën drejtuar kuvendit, duke shtuar se kjo vepër penale është kryer nga subjekte që kanë qënë në mbikëqyrje të autoriteteve shtetërore, konkretisht kompanitë e mikrokreditit nën mbikëqyrjen e Bankës së Shqipërisë dhe përmbaruesit privatë nën mbikëqyrjen e Ministrisë së Drejtësisë.