Rritja e pagave për Gjykatën Kushtetuese nuk u miratua pasi nuk arriti të merrte shumicë të cilësuar votash në seancën e fundit plenare. Pro votuan 74 deputetë, ndërsa i vetmi që doli kundër nga radhët e mazhorancës ishte Fatmir Xhafaj që ka qenë dhe një nga zërat më kritik të kësaj nisme. Projektligji “Për disa shtesa dhe ndryshime në ligjin “Për organizimin dhe funksionimin e Gjykatës Kushtetuese të Republikës së Shqipërisë”, është kiriktkuar shpesh nga socialisti Xhafaj. Në projektligjin që kërkonte 84 vota, neni që parashikonte se paga e gjyqtarit të Gjykatës Kushtetuese të ishte e barabartë me atë të Kryetarit të Gjykatës së Lartë, të ndryshohej dhe paga të bëhej sa 96% e pagës së presidentit, plus 58 % shtesa për shkak të natyrës së veçantë të punës. Në rast se kjo nismë ligjore do të miratohej atëherë paga gjyqtarëve të Kushtetueses do të shkonte në 644 mijë lekë të reja. Ndërsa drejtuesi i Gjykatës do merrte 20% shtesë për shkak të pozicionit dhe pagesa e tij mujore do arrinte në 773 mijë lekë të reja.