Fermerët që kanë aplikuar në skemat e mbështetjes me naftë, apo subvencione për blegtorinë mund të mos e përfitojnë këtë mbështetje, edhe pse plotësojnë kriteret. Fondi i vënë në dispozicion prej 200 milionë lekësh nga ana e Ministrisë së Financave vlerësohet si i pamjaftueshëm për të plotësuar të gjitha kërkesat. Shpërndarja e të ardhurave u shoqërua me debate të forta mes socialistit Erion Braçe dhe ministres Delina Ibrahimaj, në komisionin e ekonomisë. Kërkesa e Braçes për skemën mbështetëse të bujqësisë, prej 1 miliardë lekesh për naftë falas dhe tufën bazë të matrikulluar, nuk u përkthye në vendim. Fill pas përfundimit të mbledhjes së komisionit të ekonomisë, deputeti Erion Braçe deklaroi se një pjesë e konsiderueshme e bujqëve që kanë përmbushur kriteret, mbeten jashtë skemës mbështetëse për shkak se nuk ka fonde.