Udhëheqësi i ri sirian Ahmad al Jolani ka deklaruar se të gjitha armët e vendit do të vendosen nën kontrollin e shtetit. Kjo u bë e ditur gjatë vizitës në Damask të shefit të diplomacisë turke i cili kërkoi heqjen e sanksioneve ndaj Sirisë. Udhëheqësi i grupit radikal islamik HTS tha se pas konsultimeve me zyrtarët e mbrojtjes dhe ushtrisë për një strukturë të re ushtarake, "fraksionet e armatosura do të fillojnë të shpallin shpërbërjen e tyre dhe bashkimin me ushtrinë". "Ne nuk do të lejojmë absolutisht që armët t'i shpëtojnë kontrollit të shtetit, qofshin ato nga fraksione revolucionare ose nga fraksione të pranishme në zonën e Forcave Demokratike Siriane, të dominuara nga kurdët", deklaroi al Jolani në konferencën për shtyp, bashkë me ministrin e Jashtëm turk, Hakan Fidan. Ankaraja, e cila mbështet qeverinë e re siriane, i sheh Forcat demokratike siriane, të mbështetura nga SHBA si një zgjatim të armikut të saj të betuar, Partisë së Punëtorëve të Kurdistanit.