Hapësira Ajrore shqiptare nuk është prekur nga asnjë avion në harkun kohor të 48 orëve, për shkak se kontrollorët në grup kanë vendosur të bojkotojnë punën, duke ndërmarrë një protestë, për shkak të uljes së pagave të tyre. Pandemia ka ndikuar edhe për kompanitë ajrore në të gjithë botën për shkak të lëvizjeve të cunguara, pa lënë mënjanë edhe Shqipërinë. Vendi ynë ka qenë edhe më shumë i kushtëzuar për shkak të vendimmarrjes së disa vendeve të tjera në periudha të ndryshme kohore, si Gjermania, Britania e Madhe, apo edhe Italia. Trafiku ajror pësoi një rritje të lehtë me 3 për qind ose 297 fluturime, krahasuar me vitin 2020, ku kishte shumë pak fluturime ajrore. Ndërkohë, në korrikun e vitit të kaluar, Shqipëria si një prej 44 shteteve pjesë e Aviacionit Evropian ka miratuar Kodin Ajror të Republikës së Shqipërisë, ku një kapitull i veçantë i është kushtuar sigurisë dhe incidenteve të ndryshme në hapësirën ajrore shqiptare.