Kandidati për kryetar Bashkie në Tiranë, si përfaqësues i koalicionit Bashkë Fitojmë dhe i dalë nga procesi i primareve, Belind Këlliçi, ka prezantuar atë që e konsideron si një zgjidhje për trafikun në pjesën qendrore të kryeqytetit. Sipas Këlliçit zgjidhja më e mirë për këtë është ndërtimi i 2 nënkalimeve, poshtë sheshit Skënderbej pa prekur parkimin nëntokësor, që lidh bulevardin ‘Dëshmorët e Kombit’ me atë ‘Zogu i parë’. Sipas tij, ky plan do të bëjë që qytetarët të mos rrotullohen rreth qendrës ku edhe shkaktohet trafiku më i madh, por të ju jepet zgjidhje nëpërmjet nënkalimeve. Po ashtu më herët kandidati i koalicionit Meta-Berisha ka prezantuar edhe planin e tij për transportin publik. Ai është zotuar se nëse do të marrë votëbesimin e qytetarëve të Tiranës do të shndërrojë transportin publik nga me pagesë, në falas por edhe me standarde evropiane. Këtë premtim, Këlliçi e ka shndërruar në kalin e betejës së tij.