Një astronaut amerikan në pension tha në një intervistë për Radion Evropa e Lirë se misionet e përbashkëta me Rusinë në Stacionin Ndërkombëtar Hapësinor duhet të reduktohen, duke i krahasuar ato me bashkëpunimin me Gjermaninë Naziste në kulmin e Luftës së Dytë Botërore. “Bashkëpunimi me rusët në Stacionin hapësinor ndërkombatër është si të shkohje në ekspeditë në Antarktidë me nazistët më 1943”, tha Terry Virts, ish-komandant i stacionit. “Moralisht është e turpshme”, shtoi ai. Që kur Rusia ka nisur pushtimin në shkallë të plotë të Ukrainës më 2022, Stacioni Ndërkombëtar Hapësinor ka qenë një ndër fushat e rralla ku bashkëpunimi mes Rusisë dhe Perëndimit ka vazhduar. Astronautët nga NASA dhe Agjencia Hapësinore Evropiane (ESA) kanë shërbyer përkrah homologëve rusë.