Një parti e themeluar nga studentët e dhjetorit 1990, do të shndërrohej në një bunker të fortifikuar me tonelata hekuri, kjo pasi Komisioni i rithemelimit kishte paralajmëruar se më 8 janar do të merrte selinë nga kryetari i shkarkuar nga Kuvendi i 11 dhjetorit Lulzim Basha. Do të duhej ndërhyrja e policisë më 8 janar që të evitohej jo vetëm marrja e selisë, por edhe përplasjet që mund të rezultonin fatale, mes dy grupesh brenda llojit. Demokratët që përkrahnin liderin historik, të cilët ishin mbledhur me mijëra në ambientet e jashtme, dhe përkrahësit e Lulzim Bashës, të cilët kishin populluar ambientet e brendshme të selisë. Prania e personave të maskuar, brenda selisë do të shkaktonte akuza se grupet kriminale po mbronin Lulzim Bashën. Disa orë protestë e tentativa për të hyrë në selinë e blinduar, por pa rezultat.