Vendimi për vendosjen e gjobës për të gjithë ata që nuk mbajnë maskë mbrojtëse është botuar në fletoren zyrtare, duke marrë kështu fuqi ligjore. Në vendimin zyrtar janë përcaktuar edhe detajet se si gjoba do përfshihet në faturën e energjisë elektrike, do të jetë titull ekzekutiv dhe nuk do të mund të paguhet pjesërisht apo e shkëputur nga fatura e energjisë elektrike” thuhet në njoftim. Megjithatë Operatori i Shpërndarjes së Energjisë Elektrike (OSHEE) ka pasur probleme, pasi nuk ka gjetur numër kontrate me konsumatorin. Sipas udhëzimit përkatës institucionet përgjegjëse për vendosjen e gjobës për mospërdorimin e maskës janë Policia e Shtetit dhe Policia Bashkiake. Të dy këto institucione kanë detyrimin ligjor që brenda 14 ditëve të dërgojnë procesverbalin e vendosjes së gjobës në Furnizuesin e Shërbimit Universal. Ky procesverbal, në çdo rast, duhet të përmbajë minimalisht informacionin në lidhje me emrin, mbiemrin, atësinë, numrin e kartës së identifikimit, si dhe adresën e banimit të individit. Në rastet, kur i gjobituri nuk ka kontratë furnizimi të energjisë elektrike ose të dhënat e pasqyruara në gjobë nuk janë të plota apo nuk korrespondojnë me të dhënat në sistemin e faturimit kthehen sërish në Polici. Mospagesa e gjobës, si pjesë përbërëse e faturës, do ta klasifikojë individin si debitor dhe kontrata përkatëse e energjisë elektrike do të dërgohet për ndërprerje të furnizimit me energji elektrike, sipas afateve dhe procedurave të përcaktuara nga Enti Rregullator i Energjisë.