Aktori i njohur i skenës shqiptare, Naun Shundi, është ndarë nga jeta në moshën 66-vjeçare pas një beteje të vështirë me një sëmundje të rëndë. Shundi u shkëput nga puna më 16 gusht të këtij viti, për t’iu nënshtruar një trajtimi të specializuar në Francë. Më pas Shundi u rikthye në Shqipëri, ku vijoi mjekimin në QSUT, shpenzimet e të cilit u mbuluan nga Ministria e Shëndetësisë. Naun Shundi është një nga figurat më të vlerësuara të skenës shqiptare, me kontribute të shumta në teatër dhe dramaturgji, si dhe themelues i një hapësire të veçantë kulturore përmes teatrit të tij. I diplomuar në vitin 1977 si regjisor në shkollën e Mesme të Kulturës. Në 1983 u diplomua aktor në Institutin e Lartë të Arteve (sot Akademia e Arteve). Më pas specializohet në regji në Teatrin Kombëtar të Bukureshtit dhe pranë Akademisë së Teatrit dhe Filmit në Bukuresht, 1995. Ka interpretuar, shkruar, regjizuar dhe mësuar drejtimin dhe interpretimin në skenë për breza artistësh. Me mbi 60 role të luajtura, Naun Shundi, ka kontribuar në mbarë karrierën e tij për promovimin e teatrove dhe veprave shqipe, duke theksuar rëndësinë e “të folurit shqip” në skenë.