Aktorja e njohur Edi Luarasi është ndarë nga jeta në moshën 81 vjecare. Lajmi i hidhur u bë me dije nga profesori Përparim Kabo përmes një njoftimi në Facebook. Kabo shkruan se ka pushuar zemra e një gruaje fisnike, e një mërditoreje trime që i beri ball diktaturës duke mbajtur familjen dhe nderin e saj. Ishe dhe do të mbetesh model, shton profesori në reagimin e tij. Edi Luarasi lindi në Tiranë në vitin 1940. Në 1956, kur ishte 16 vjeçe, së bashku me të motrën këndonin në skenën e Teatrit të Estradës. U diplomua për aktore në 1963 dhe u emërua aktore në Teatrin Popullor. Roli i parë i saj ishte Vera në dramën “Shtëpia në bulevard”. Më pas, në dhjetë vjet, vijnë një sërë rolesh të arrirë, ku veçojmë Lenën tek “Doktor Aleksi”, Kordelja tek “Mbreti Lir”, Cuca tek “Cuca e maleve”, Kristina tek “Fytyra e dytë”, etj. Më pas u martua me regjisorin e mirënjohur Mihal Luarasi. Pas kësaj u përjashtua nga Teatri Kombëtar në 22 janar 1974, për arsye politike. Më pas u rikthye në skenë në mars 1991, me interpretimin dinjitoz të rolit të damës plakë në dramën “Vizita e Damës plakë”. Interpretoi edhe në 1995 në dramën “Hekurat”, më vonë, me sukses në dramat “Cilindri”, “Streha e të harruarve”, etj. Ka interpretuar role edhe në filmin artistik shqiptar.