Situata e zjarreve në vend ka ardhur drejt përmirësimit, megjithatë ende shumë vatra janë aktive, ose riaktivizohen herë pas here si paosjë e temperatyrave të larta dhe erës së fortë. Sipas të dhënave të Qendrës Kombëtare Operacionale të Emergjencave Civile në 24 orët e fundit janë shuar 33 vatra zjarri nga 39 vatra të raportuara. Aktivë vijojnë zjarret në zonën pyjore Bode në Maliq, fshatin Skuraj në Kurbin, Malin e Kakarriqit në Lezhë, fshatin Gjadër po në Lezhë, fshatin Zavalinë në Elbasan dhe fshatin Kus në Tiranë. Për shuarjen e plotë edhe të këtyre zjarreve janë duke punuar strukturat e pushtetit vendor të mbështetura nga ato në nivel qendror. Aktualisht vatrat nuk paraqesin rrezik për zona të banuara. Në operacionet e fundit për shuarjen e vatrave morën pjesë rreth 1 mijë e 400 forca operacionale me 75 mjete si dhe helikopteri Cougar.