Vendimi për shqyrtimin e kërkesës së SPAK për arrestimin e Sali Berishës u shty sërish pas një beteje kërkesash në seancën që u mbajt këtë të mërkurë. Në seancën e nisur në orën 11:00, dy prokurorët e SPAK, Arben Kraja dhe Enkeleda Millonai mbrojtën para gjykatës kërkesën për ashpërsimin e masës së sigurisë nga detyrim paraqitje në arrest shtëpie për Sali Berishën me arsyetimin se ai nuk respektoi më herët masën e detyrimit të paraqitjes. Avokatët e Berishës kërkuan fillimisht nga gjyqtarja Irena Gjoka që seanca të mbahej e hapur për mediat. Kërkesa e tyre u refuzua nga ana e gjyqtare, çka pasoi një kërkesë të re, por të përsëritur prej avokatëve; atë të përjashtimit të gjyqtares. Deri në shqyrtimin e kërkesës për përjashtimin e Gjokës, seanca u shty sërish për ditën e enjte në orën 15:00. Avokati i Berishës, Genc Gjokutaj e konsideroi procesin tërësisht politike.