Seanca e radhës ndaj ish ministrit të Shëndetësisë, Ilir Beqaj për dosjen sterlizimit u shty pas kërkesës së palës mbrojtëse për t’i vënë në dispozicion qëndrimin e prokurorisë së posaçme në lidhje me ashpërsimin e akuzës. Avokati i Beqajt, Ermal Yzeiraj tha se mbrojtja nuk di qëndrimin e prokurorisë për ndryshimin e akuzës nga shpërdorim detyre në vjedhje duke shpërdoruar detyrën dhe as cilësimi i veprës në formën e një grupit të strukturuar kriminal. Në seancë, ish ministri i Shëndetësisë dhe ish drejtuesi i agjencisë për menaxhimin e fondeve të huaja, tha se ka marrë vetëm një vendim të dhjetorit, por jo rikualifkimin e akuzës. Prokurori Edvin Kondilli dorëzoi në gjykatë kërkesën për pezullimin e afateve të paraburgimit dhe të arrestit shtëpiak. Në këto rrethana, gjykata vendosi shtyrjen dhe seanca e radhës do të mbahet më 13 mars. Ilir Beqaj ndodhet në masën e sigurisë arrest me burg për dosjen tjetër, që ka të bëjë me abuzimet me fondet e Bashkimit europian.