Shtyhet për të disatën herë seanca në Apelin e Posaçëm Antikorrupsion për ish-kryebashkiakun e Durrësit Vangjush Dako. Ky i fundit nuk është paraqitur në Gjykatë por është përfaqësuar nga avokati i tij Kamerion Salillari. Ndryshe nga seancat e mëparshme ku përfaqësohej nga Petrit Ismaili. Kjo gjë ka shërbyer si një nga shkaqet për shtyrjen e seancës pasi mbrojtja kërkoi kohë të njihet me aktet. Përfaqësuesi i SPAK Sotir Kllapi tha se “Ky proces është ngritur nga ankimi i të pandehuri, dhe se duhen marë parasysh afatet e përcaktuara në ligj. Trupa gjykuese vendosi që seanca e radhës të mbahet më 11 korrik në orën 13:00. Gjykata e Posaçme e Shkallës së Parë e gjeti fajtor ish-kryetarin e Bashkisë Durrës, Vangjush Dako për shpërdorim detyre në dy raste dhe e dënoi atë me 2 vjet e 8 muaj heqje lirie. Po ashtu, u caktua dhe dënimi plotësues për heqjen e të drejtës për të ushtruar funksione publike për një periudhë prej 5 vitesh. Tre të pandehurit e tjerë të akuzuar për falsifikim dokumentesh u dënuan me nga dy vjet burgim, por masat ndëshkimore u pezulluan dhe u vendosën në shërbim prove. Dako i cili prej shkurtit të 2024 ndodhet në arrest shtëpie e ankimoi këtë vendim, në Apel, duke kërkuar pafajësi.