Kostot e prodhimit për fermerët u rritën me 14 për qind përgjatë vitit të kaluar në krahasim me vitin 2022, rritje që u reflektuan edhe në çmimet e tyre për konsumatorin, si dhe në uljen e prodhimit. Të dhënat e INSTAT tregojnë se rritja e kostove ishte më masive në sektorin e blegtorisë, por preku edhe prodhimet e agrumeve, perimeve dhe të ullirit e nënprodukteve të tij. Anketa e INSTAT tregon se kostoja e prodhimit në blegtori u rrit me 18 për qind, ndërsa për prodhimet bujqësore me 10 për qind. Rritja më e madhe e kostos raportohet në sektorin e mbarështimit dhe rritjes së shpendëve me 28 për qind si dhe në prodhimin e qumështit. Të dhënat e INSTAT reflektojnë shqetësimet e ngritura vazhdimisht nga fermerët, ndërsa sektori ka ulur prodhimin dhe tregtarët janë orientuar masivisht drejt produkteve të importit.