Shtrëngata dhe reshje me intensitet të lartë pushtuan gjithë territorin. Temperaturat e larta të verës ia lanë vendin erës së fortë dhe stuhisë që rrëmbeu karrige, çadra dhe çdo objekt tjetër të lëvizshëm në rrugët e vendit. Në kryeqytet pati probleme në aeroportin e Rinasit, ku rreth 14 fluturime vonuan në mbërritje dhe shtatë në nisje. Konkretisht problematika pati në linjat me Hamburgun, Pescaran dhe Veronan. Tragetit të linjës Durrës – Bari ‘Francesca’ iu shkëput një nga litarët lidhës me kalatën, po fatmirësisht situata u menaxhua në kohë falë ndërhyrjes së autoriteteve detare. Në qytetin bregdetar të Vlorës rreshjet e dendura të shiut ishin prezente për më shumë se 60 minuta, duke përmbytur disa akse rrugore, kryesisht në lagjen pavarësia, zonën e Skelës, lagjen 29 nëntori si dhe bulevardin Ismail Qemali. Po punohet nga institucionet përgjegjëse për pastrimin dhe hapjen e pusetave dhe kanaleve kulluese. Në Lezhë përmbytjet kanë prekur disa zona kryesore duke filluar nga bulevardi “Gjergj Fishta” dhe blloku i banimit “11 Janari” në lagjen Besëlidhja. Niveli i ujit ka arritur deri në 30 cenimetra duke bllokuar hyrjet e pallateve. E njëjta panoramë ka shoqëruar thuajse të gjitha qarqet e vendit, teksa meterologët paralajmërojnë po të njëjtat kushte klimaterike edhe ditën e diel.