Shërbimi i sterilizimit nëpër spitalet e vendit, që aktualisht është dhënë me koncesion që është nën hetim nga SPAK dhe për të cilin është nën akuzë ish ministri i Shëndetësisë, Ilir Beqaj dhe ish zëvendësi i tij, Klodjan Rjepaj do të ofrohet nga shteti. Qeveria ka miratuar vendimin për ngritjen e një shoqërue aksionare me kapital 100 për qind shtetëror, që do të ofrojë shërbimet e integruara të sterilizimit në të gjitha spitalet publike të vendit. Vendimi i publikuar në fletoren zyrtare ngre operatorin e shërbimeve të integruara të sterilizimit, që aktualisht është dhënë me koncesion të një kompani private, por që i përfundon afati këtë vit. Vendimi parashikon një kapital fillestar prej 200 milionë lekësh nga buxheti i shtetit për vitin 2026 dhe transferimin pa pagesë të aseteve që i kalojnë shtetit pas përfundimit të kontratës koncesionare të nënshkruar në vitin 2015.