Dy projekte të ndara janë shpallur fituese për ndërtimin e shtëpisë së re të fëmijëve dhe tre kullave që do të ngrihen në truallin e ‘Zyber Hallullit’ në Tiranë. Pas më shumë se katër orë prezantimi të projekteve pjesëmarrëse, juria vlerësoi se asnjëra prej ideve të prezantuara nuk trajtonte në mënyrë të plotë kërkesat për harmonizimin e shtëpisë së re të fëmijëve me kompleksin e inspektoriatëve shtetërore. Për këtë arsye, u vendos që fituesit të ishin të ndarë, ku një projekt-ide u shpall fituese për shtëpinë e re të fëmijës, që do të ngrihet në godinën aktuale, që ndodhet në Rrugën e Elbasanit dhe një fitues tjetër për ndërtimin e kompleksit të inspektoriateve shtetërore në truallin e kësaj shtepie. Projekti fitues për kompleksin e inspektoriateve përfshin ndërtimin e tre kullave me lartësi deri në 35 katë, që do të vendosen në zonën mes stadiumit ‘Air Albania’, Rrugës së Elbasanit dhe Rrugës Dervish Hima. Në garë morën pjesë pesë projekte, ku për kompleksin e inspektoriateve shtetërore që të gjithë propozuan ndërtimin e tre, ose katër kulla me lartësi nga 20 deri në 45 kate. Gara u organizua nga Korporata Shqiptare e Investimeve.