3 personat e arrestuar për laboratorin e drogës, që u zbulua brenda një godine katërkateshe përgjatë aksit rrugor Lezhë-Milot, u njohën me masën e sigurisë në Gjykatën e Lezhës. Në seancën gjyqësore të zhvilluar me dyer të mbyllura, që zgjati rreth 60 minuta, gjykata e cilësoi të ligjshëm arrestimin e shtetasve Arben Gjergji, 57 vjeç dhe Arnold Gjergji, 22 vjeç, si autorë të dyshuar të kësaj veprimtarie kriminale dhe vendosi masën e sigurisë arrest në burg. Për punonjësin e OSHEE, Gjon Doda u vendos masa e sigurisë arrest në shtëpi për veprën penale “Shpërdorim Detyre”. Laboratori i drogës u zbulua në fillim të javës, ku nga kontrolli i ushtruar në katin e dytë të objektit, u gjetën dhe u sekuestruan në cilësinë e provës materiale: 8.8 kilogram hashash gati për shitje, 1064 bimë kanabis, 960 fidanë kanabisi të mbjellë në kubikë, 850 fara kanabisi, 106 llamba me transformator që shërbenin për kultivimin e bimëve narkotike, një armë zjarri automatike me dy krehra me fishekë, një pistoletë sportive me fishekë, një automjet dhe katër aparate celularë. Po ashtu, nga kontrolli i kryer në banesat e shtetasve të arrestuar, u gjetën dhe u sekuestruan 180 gramë kokainë, një pistoletë me mulli, një armë zjarri pushkë dhe një armë sportive.