Pesë persona janë vënë në pranga pasi akuzohen se janë pjesë e një rrjeti trafiku të lëndëve narkotike që vinte nga Holanda dhe shitej në ishullin luksoz të Mykonos. Mësohet se operacioni është zhvilluar një ditë më parë nga autoritetet greke dhe vetëm këtë të shtunë janë zbuluar të dhënat e para. Shqiptari që drejtonte këtë rrjet është Gjergji Kapaj, 43 vjeç, një person me precedentë të mëparshëm penalë. Mediat greke e kanë cilësuar grupin shqiptar si “unazë” të trafikut në Mykonos, ndërsa drejtuesin Kapaj, një kriminel të rrezikshëm, të skeduar për disa ngjarje por që ka aritur t’i shpëtojë policisë në të shumtën e rasteve. Grupi ishte vënë nën hetim që në muajin nëntor të vitit të kaluar, pas një telefonate anonime që ishte bërë në polici. Një qytetar ankohej për disa shqiptarë që shisnin kokainë në Athinë dhe Mykonos, kryesisht turistëve. Përgjimet më pas zbuluan rrjetin dhe shqiptarin, ‘kokën e unazës’.