Dhjetëra qytetarë i janë përgjigjur thirrjeve për protestë në urën mbi lumin Ibër në Mitrovicë, pavarësisht thirrjeve të institucioneve të Kosovës për të mos e bërë këtë. Thirrja është bërë përmes rrjeteve sociale dhe Policia e Kosovës ka deklaruar se po përhapet nga persona të panjohur dhe profile të dyshimta. Personat e mbledhur kanë kënduar herë pas here këngë si “besa besë”, “jo nuk ndahet Mitrovica”, si dhe po brohorasin “UÇK”. Ministri i Brendshëm, Xhelal Sveçla, u ka bërë thirrje qytetarëve që mos u përgjigjen thirrjeve për protestë në Mitrovicë. Ai ka deklaruar se këto thirrje janë të dyshimta dhe janë bërë nga organizime anonime. Sveçla ka deklaruar se thirrjet për protestë në jug të Mitrovicës dhe marshim drejt veriut, janë të panevojshme dhe nuk i ndihmojnë Kosovës. “Thirrjet për protestë në jug të Mitrovicës dhe me synim marshimin drejt veriut të vendit, janë të panevojshme dhe nuk i ndihmojnë Republikës së Kosovës. Përmes këtij organizimi në rrjetet sociale po tentohet të nxiten tubime të panevojshme. Sipas vlerësimeve nga institucionet e sigurisë, kjo thirrje po përhapet nga persona të panjohur dhe profile të dyshimta nëpër rrjetet sociale”, ka shkruar ministri i Brendshëm.