Tre në katër shqiptarë që hyjnë në Britaninë e Madhe ilegalisht, qoftë përmes varkave në La Mansh, qoftë përmes fshehjes nëpër kamionët e mallrave janë të dënuar. Këto janë shifrat e autoriteteve britanike, që raportojnë se shqiptarët tashmë përbëjnë numrin më të madh të të huajve në burgjet vendase. Sipas të dhënave, aktualisht janë 1582 shqiptarë në burgjet britanike, ku 93 prej tyre janë dënuar vetëm në dy javët e para të këtij viti. Shumica e shqiptarëve, thonë raportet britanike, janë të dënuar për kultivim hashashi në ambiente të mbyllura, të tjerët për trafikt dhe shpërndarje kokaine, ndërsa mes atyre që janë pas hekurave ka edhe përdhunues, pengmarrës dhe vrasës. Autoritetet britanike vlerësojnë gjithashtu se grupet kriminale shqiptare kontrollojnë sot rreth një të tretën e shpërndarjes së kokainës në Britani.