INSTAT raportoi se numri i vdekjeve ra me 21 për qind në vitin 2022 në krahasim me vitin 2021, duke sugjeruar se faktori i pandemisë u tejkaluar vitin e kaluar. Sipas INSTAT, vitin e kaluar numërohen gati 24 mijë vdekje në total, nga 30 mijë e 500 që ishin në 2021. Megjithatë, shqetësues është faktori kryesor i vdekjeve. Më shumë se gjysma e shqiptarëve që ndërruan jetë vitin e kaluar u raportuan për probleme me zemrën dhe qarkullimin e gjakut. Ky grup, thotë INSTAT përbën 54 për qind të totalit të vdekjeve, ose mbi 13 mijë të tilla. Edhe vdekjet e shkaktuara nga sëmundjet tumorale janë rritur në krahasim me 2021, duke zënë 13.5 për qind të totalit. Vdekshmërinë e lartë nga zemra, mjekët dhe specialistët e lidhin me jetën sedentare, mungesën e kulturës së kontrolleve periodike për të parandaluar sëmundjet dhe dietat jo të shëndetshme ushqimore.