Kostas Karamanlis dhe Andonis Samaras, dy kryeministrat e fundit të Demokracisë së Re akuzojnë pasaardhësin e tyre, Kiriakos Mitsotakis se po turpëron Greqinë në arenën ndërkombëtare, duke lejuar vende si Shqipëria, Maqedonia e Veriut dhe Turqia ‘të tallen me Athinën’. Dy udhëheqësit grekë folën gjatë një aktiviteti të mbajtur në Greqi. “Po hamë turpin me bukë! Poshtërime njëra pas tjetrës, nga njerëzit në Shkup, nga shqiptarët dhe sigurisht edhe nga miqtë tanë, turqit”, deklaroi ish-Kryeministri Samaras. Ai kërkoi nga Mitsotakis që të rikthehet në diplomacinë tradicionale të Athinës, të vendosë veton ndaj Shqipërisë dhe Maqedonisë së Veriut në rrugën e tyre drejt integrimit europian dhe të rrisë presionin ushtarak dhe diplomatik ndaj Turqisë për të respektuar të drejtat dhe sovranitetin grek për ishujt e kontestuar në Egje.