Një avion japonez që po fluturonte nga Tokio për në Teksas u detyrua të bënte një ulje emergjence pasi një pasagjer u përpoq të hapte njërën nga dyert gjatë fluturimit. Fluturimi 114 i All Nippon Airëays, ANA, u devijua për në Seattle disa orë pas ngritjes në ajër, të shtunën "për shkak të një pasagjeri të padisiplinuar", tha linja ajrore. Policia e Portit të Seattle-it u tha mediave se ishin njoftuar për një burrë që "u përpoq të hapte derën e daljes gjatë fluturimit". Burri, i cili nuk u identifikua, po “përjetonte një krizë mjekësore” dhe u desh të ndalohej nga pasagjerët e tjerë dhe ekuipazhi i fluturimit, tha policia. Ai u dërgua më vonë në spital. “Siguria e pasagjerëve dhe ekuipazhit tonë është përparësia jonë kryesore dhe ne përgëzojmë përpjekjet e forcave lokale të rendit për mbështetjen e tyre”, tha ANA në një deklaratë. Ndërsa avioni po priste në pistën e Aeroportit Ndërkombëtar të Seattle-it, Tacoma, një person i dytë u largua nga bordi për "sjellje të padisiplinuar", thanë autoritetet. Të dhënat e fluturimit tregojnë se avioni arriti në destinacionin e tij, Aeroportin Ndërkontinental George Bush në Hjuston, të shtunën rreth orës 12:40 sipas orës lokale, katër orë pas kohës së planifikuar të mbërritjes. Ky është incidenti më i fundit në një varg incidentesh të ngjashme.