Një 28-vjeçar ka rënë në prangat e Policisë së Sarandës. Romario Omeri u kap nga forcat blu duke shpërndarë doza lënde narkotike kanabis nëpër zonat bregdetare. Në kuadër të operacionit policor të koduar “Parts 15”, gjatë kontrollit fizik dhe kontrollit në automjetin e tij, 28-vjeçarit i janë sekuestruar një sasi kanabisi e ndarë në doza të gatshme për shitje, një peshore elektronike dhe një shumë parash e dyshuar e përfituar nga kjo veprimtari kriminale. Specialistët për Hetimin e Narkotikëve të Komisariatit të Policisë Sarandë, në vijim të operacioneve të njëpasnjëshme kundër veprimtarisë kriminale të shitjes së lëndëve narkotike në doza, në zonat urbane dhe ato bregdetare, kanë finalizuar një tjetër operacion për goditjen e një rasti të kësaj veprimtarie kriminale. Materialet procedurale i kaluan Prokurorisë, për veprime të mëtejshme, për veprën penale “Prodhimi dhe shitja e narkotikëve”.