Në kërkim të gjurmëve të Ervis Martinajt, Prokuroria e Kurbinit iu drejtu me rekurs Gjykatës së Lartë për ish efektivin e policisë, Jeton Lami, personi i fundit që sipas të dhënave hetimore, provohet të ketë qënë në shoqërinë e Ervis Martinajt. Prokurorët e Kurbinit kërkojnë të marrin në pyetje ish efektivin e policisë, Jeton Lami në lidhje me hetimet që po kryen organi i akuzës pas kallëzimit të familjarëve të Martinajt për zhdukjen e tij. Nëse Lami zgjedh të shndërrohet në dëshmitar të drejtësisë, mund të hidhet më shumë dritë mbi rrethanat që çuan në zhdukjen e Ervis Martinajt. Janë disa pista por ende nuk është provuar nëse Martinaj inskenoi zhdukjen e tij apo u rrëmbye nga kundërshtarët e tij. Kërkesa e dytë e Prokurorisë së Kurbinit për Gjykatën e Lartë është që të mos ndryshohet masa e sigurisë “arrest me burg” e caktuar ndaj Jeton Lamit për shpërdorim detyre, sikurse parashikon neni 238 i Kodit të Procedurës Penale. Për ish efektivin ka prova të mjaftueshme se jo vetëm përkrahte Martinajn duke dekonspiruar operacionet policore, por gjithashtu ofronte edhe transport për mbretin e lojërve të fatit.