Bordi tashmë përcakton thuajse çdo ditë një nivel të ri çmimesh tavan për hidrokarburet, një situatë kjo e paprecedentë dhe që ka sjellë reagimin e menjëhershëm të shoqatës së hidrokarbureve në vend. Për Top News, kryetari i shoqatës së hidrokarbureve, Luigj Aliaj deklaroi se për shkak të ndërhyrjeve të Bordit, çmimi i naftës në tregun vendas është më i shtrenjtë sesa do të ishte nëse do të vendosej nga vetë tregu. Në shpjegimin e tij, ai deklaroi se nëse çmimet nuk do ishin të përcaktuara, kompanitë do furnizoheshin, dikush për 10 ditë, dikush për 5, dikush për 20 dhe rritja në tregun vendas do vinte pas 3 apo 4 ditësh. Tregu do e amortizonte për shkak të konkurencës së kompanive me njëra- tjetrën. Kurse në kushte të ndëryrjes së bordit të gjitha kompanitë blejnë sa nevojat ditore, pasi kanë friken se nëse çmimi i vendosur nga bordi ulet, atëherë çmimi i imponuar i kalon kompanisë në humbje.