Prokuroria e Posaçme ka marrë zyrtarisht të pandehur kryetarin e Bashkisë së Kolonjës, Erion Isai. Kreu i kësaj bashkie ishte nën hetim prej kohësh nga ana e SPAK për disa procedura tenderimi ku ishte kallëzuar. Statusi i pandehur i është komunikuar këtë të martë, bashkë me gjashtë persona të tjerë, zyrtarë dhe ish zyrtarë të bashkisë që ai drejton. Ndaj Erion Isait, Prokuroria e Posaçme ka ngritur dy akuza, atë të shkeljes së barazisë në tendera dhe shpërdorim detyre. Hetimet lidhen me tenderin për rrugën e re Korçë-Ersekë, që u shemb më pas dhe për një tender ujësjellësi. Në të dyja rastet, Isai akuzohet se me veprimet dhe mosveprimet e tij ka ndikuar në përcaktimin e fituesve. Gjatë hetimi, prokurorët e posaçëm kanë analizuar procedurat e tenderimit të shpallura nga Bashkia e Kolonjës, ku janë ngritur dyshimet se një pjesë e mirë e tyre janë të paracaktuara, me garë fiktive dhe me dokumentacione të falsifikuara. Paralelisht me marrjen të pandehur për shpërdorim detyre dhe shkelje të barazisë me tenderat, SPAK po heton Erion Isain edhe për vepra më të rënda penale, si korrupsioni dhe pastrimi i produkteve të veprës penale.