Hetimi nga SPAK i dosjes së inceneratorit të Elbasanit po vendos një precedent të rrezikshëm për sigurinë ligjore në vend. Ish-ministri i Drejtësisë, Ylli Manjani thotë se shkelja e parimit të gjësë së gjykuar bie ndesh me konventat ndërkombëtare të të drejtave të njeriut, që Shqipëria ka ratifikuar, kushtetutën dhe ligjet penale të vendit. - Të nisësh një çështje dhe më keq akoma të ngresh një akuzë zyrtare ndaj të njëjtit person me të njëtjat fakte, për të njëjtën ngjarje dhe mbi të njëjtat pretendime ËSHTË E NDALUAR. E ndalon Kushtetuta e Republikës; Konventa Europiane e të drejtave të Njeriut; legjislacioni penal në Shqipëri. Ish-ministri dhe avokati thotë se SPAK po e bën standard sjelleje dhe kjo s’mund të injorohet, pasi kërcënon çdo qytetar. Me rëndësi është të kuptojmë rrezikun që i kanoset publikut nga dalja e drejtësisë prej shtratit Kushtetues dhe ligjor. Duke iu referuar provave të dorëzuara nga prokurorët e posaçëm, avokati i Mirel Mërtirit dhe Stella Gugalljas tha se për të njëjtat fakte dhe të njëjtat akuza çështja është pushuar nga Gjykata e Elbasanit me vendim të formës së prerë në janar të 2018-s.