Dy baza ajrore kryesore ruse që mbajnë avionë luftarakë bërthamorë janë sulmuar me dronë në një sulm të shënjestruar, duke i dhënë një goditje të rëndë luftës së Putinit. Një zyrtar i Sigurisë Ukrainase i tha agjencisë së lajmeve Reuters se SBU kreu një sulm të madh me dronë ndaj mbi 40 avionëve ushtarakë rusë, që tani po quhet "Pearl Harbour-i i Rusisë". Burimi nuk specifikoi se ku ndodhi sulmi me dronë, por media ukrainase tha se baza ajrore Olenya, shtëpia e bombarduesve strategjikë Tu-95 të Rusisë, ishte shënjestruar. Baza e dytë nën zjarr raportohet të jetë baza ajrore bërthamore Belaya në rajonin Irkutsk të Siberisë lindore, rreth 4600 km larg nga Ukraina. Guvernatori rus i rajonit Murmansk konfirmoi se sulmi me dronë kishte ndodhur. Pamjet e jashtëzakonshme tregonin tym që dilte nga bazat e Putinit. Kanali Pravda Gerashchenko i Ukrainës në telegram tha: “Një operacion special po kryhet për të demilitarizuar Rusinë. SBU raporton shkatërrimin e avionëve bombardues rusë pas vijave të armikut”. Në poston po ashtu flitej për shkatërrimin e më shumë se 40 avionëve, duke përfshirë A-50, Tu-95 dhe Tu-22M3. Banorë vendas raportuan se kishin dëgjuar shpërthime ndërsa një sërë dronësh ukrainas goditën bazat e Putinit. Të dy aeroportet janë shumë larg vijës së frontit, por përsëri janë goditur nga dronët ukrainas. Sulmi besohet se u nis nga brenda Rusisë, ndoshta nga brenda kamionëve që lëviznin pranë objektivave të tyre. Një raport madje thekson se shoferi i kamionit që lëshoi dronët mund të mos e dinte se mjeti i tij ishte mbushur me dronë. Sipas kanalit Baza në telegram, shoferi është ndaluar nga autoritetet ruse.