Nuk kanë mjaftuar 7 orë diskutime e debat në mbledhjen e grupit parlamentar të Partisë Demokratike për të gjetur gjuhën e përbashkët mes palëve. Top News mëson se këtë të mërkurë Komisioni i Rithemelimit do të zhvillojë një mbledhje tjetër, e cila vjen pas debateve të shumta në mbledhjen e grupit një ditë më parë, me akuza e kundër-akuza. Mbledhja mësohet se do të zhvillohet në orën 19:00, teksa vjen pas deklaratave të bërë nga lideri historik Sali Berisha, i cili tha se moralisht nuk e njeh Enkelejd Alibeajn as si kryetar të grupit parlamentar, nisur nga fakti se ky i fundit nuk u tërhoq nga animimi i vendimit të 25 marsit. Ndonëse nuk ka një rend të qartë për atë që do të diskutohet, në mbledhjen e grupit parlamentar u propozua ndalimi i procesit të riorganizimit dhe zgjedhjeve në bazën e PD si dhe shtyrjen e tyre. Po ashtu është kërkuar mbajtja e një Kuvendi Pajtimi mes demokratëve. Të gjitha këto çështje pritet të diskutohen në këtë mbledhje të Komisionit të Rithemelimit, që në bazë të vendimit të gjykatës është organi kolegjial që drejton Partinë Demokratike.