Pas luftës disa ditore me zjarret në Shëngjin, situata po shkon drejt përmirësimit. Teksa deri mbrëmjen e së martës, flakët mbërthyen Ranën e Hedhun, të mërkurën situata duket se është vënë nën kontroll. Megjithatë rreziku nuk ka kaluar ende, pasi era e fortë mund të riaktivizojë vatrat e zjarrit që janë shuar. Puna e zjarrfikësve vijon në terren, por me intensitet më të ulët, për shkak të izolimit të shumë vatrave që ende nuk janë shuar. Një përmirësim kanë patur dhe zjarret në Gjirokastër gjatë orëve të natës dhe mëngjesit të së mërkurës. Rreth orës katër të mëngjesit pati një riorganizim të forcave të shërbimit zjarrfikës për izolimin e vatrave të zjarrit mbi parkun e Viroit si dhe për izolimin e vatrës drejt fshatit Mashkullorë. Në operacione gjatë natës u aktivizuan rreth 80 forca zjarrfikëse dhe vullnetare.