Sistemi Shengen i Bashkimit Europian për lëvizjen e lirë është një dështim dhe kufijtë e jashtëm të BE-së duhet të përforcohen. Kjo është thirrja e fortë që ka bërë Kancelari austriak, Karl Nehammer. Gjatë një konference për shtyp, pas një takimi me kryeministrin holandez, në Vjenë, Nehammer u tha gazetarëve se ai dhe Mark Rutte, ishin të dy mbështetës të flaktë të BE-së, por rregullat dhe institucionet e unionit duhet të merren seriozisht. “Kjo do të thotë që Komisioni Europian, monitoruesi i traktateve, duhet të sigurojë zbatimin e tyre”, tha Nehammer. “Në të vërtetë ne jemi përballë një dështimi sistematik. Shengeni nuk funksionon dhe procedura e azilit në BE, që e kemi në fuqi, nuk funksionon. Këto janë probleme të mëdha. Të dy ne jemi europianë të flaktë. Për ne, Bashkimi Europian është e ardhmja e Europës, por kjo do të thotë që institucionet duhet të bëjnë punën e tyre”. Ai bëri thirrje që t’i jepet mbështetje financiare Bullgarisë dhe Rumanisë, ndërkohë që kundështon futjen e tyre në zonën Shengen. Ai kujtoi një vizitë në kufirin mes Bullgarisë dhe Turqisë, ku sipas tij, situata ishte e vështirë.