Një ditë pasi Rama i komunikoi vendimin e tij për ta shkarkuar nga kabineti qeveritar, ministri i mbrojtjes, Pirro Vengu u shfaq në komandën e forcës tokësore në Zall Herr krah të ngarkuarës me punë të Shteteve të Bashkuara të Amerikës, Nancy VanHorn, për të marrë në dorëzim sistemet raketore Javelin. Diplomatja e cilësoi Vengun si një bashkëpunëtor të mirë. VanHorn: “Rritja e angazhimit tuaj për sigurinë është një kapar për të ardhmen. Ne jemi krenar që jemi partner në këto përpjekje, gjithashtu dua të them që jemi tejet të lumtur që të kemi mundësinë të kemi këtu ministrin, i cili ka qënë një partner shumë i fortë i Shteteve të Bashkuara në muajt e fundit dhe jam tejet e kënaqur t’i shikoj këto sisteme.”