Departamenti Amerikan i Shtetit i bën thirrje drejtpërdrejt Presidentit serb, Aleksandër Vuçiç që të lirojë menjëherë tre policët e rrëmbyer të Kosovës. Përmes një deklarate të zëdhënësit Mattheë Miller, DASH kërkon lirimin pa kushte të tyre, ndërsa akuzat e ngritura nga prokuroria serbe i cilëson si të stisura e të rreme. ‘I bëjmë thirrje Presidentit Vuçiç dhe qeverisë serbe që të lirojë menjëherë dhe pa asnjë kusht tre policët e Kosovës të ndaluar më 14 gusht. Arrestimi dhe mbajtja e tyre në burg mbi akuza të stisura ka përshkallëzuar një situatë që ishte e tensionuar’, thuhet në deklaratën e zëdhënësit. DASH bën thirrje që dy vendet të ndjekin planin me tre pika të BE-së dhe të rikthehen në tryezën e dialogut pa vonesa. Të premten, Britania e Madhe dhe Gjermania ishin dy vendet që kërkuan nga Serbia lirimin e menjëhershëm dhe pa kushte të tre policëve të Kosovës. Tre policët mbahen në qytetin e Krajlevës në Serbi. Po të premten, gjykata serbe vendosi masën e sigurisë arrest me burg për 30 ditë me akuzën e armëmbajtjes pa leje, ndërsa akuza për terrorizëm u tërhoq nga prokuroria.