Departamenti amerikan i Shtetit ka paralajmëruar udhëtarët amerikanë që të shmangin Bjellorusinë, për shkak të, siç ka thënë, tensioneve përgjatë kufirit të Bjellorusisë me Ukrainën. Paralajmërimi vjen pas rritjes së shqetësimeve globale se Rusia mund të jetë gati për të pushtuar Ukrainën fqinje. Moska, tash e sa javë, ka grumbulluar më shumë se 100 mijë trupa në zonat kufitare, duke përfshirë Bjellorusinë, e cila ndan kufirin edhe me Rusinë, edhe me Ukrainën. “Për shkak të rritjes së aktivitetit ushtarak rus pranë kufirit me Ukrainën, qytetarët amerikanë që mendojnë të udhëtojnë në Bjellorusi, duhet të jenë të vetëdijshëm se situata është e paparashikueshme dhe se ka tensione të shtuara në rajon”, thuhet në paralajmërimin e Departamentit amerikan të Shtetit. Sipas tij, mundësia e Qeverisë amerikane për të ofruar shërbime rutinore ose emergjente për qytetarët amerikanë në Bjellorusi, është e kufizuar, për shkak të kufizimeve që Qeveria bjelloruse ka vënë tashmë mbi personelin e Ambasadës amerikane në Minsk. “Duke pasur parasysh paqëndrueshmërinë e shtuar të situatës, qytetarët amerikanë këshillohen fuqimisht që të mos udhëtojnë në Bjellorusi”, thuhet në paralajmërim.