Presidenti amerikan Joe Biden paralajmëroi kryeministrin izraelit Benjamin Netanyahu se SHBA nuk do të marrë pjesë në një kundërsulm të mundshëm kundër Iranit, një opsion që kabineti i luftës së Netanyahut e mbështet tani pas sulmit masiv me dronë dhe raketa në territorin izraelit. Kërcënimi i një lufte të hapur mes armiqve të betuar në lindjen e mesme dhe tërheqja e Shteteve të Bashkuara, e vendos rajonin buzë një gremine, duke ndezur thirrje për vetëpërmbajtje nga fuqitë globale dhe kombet arabe. "Lindja e Mesme është në prag të shpërthimit të madh. Populli i rajonit po përballet me një rrezik real të një konflikti shkatërrues. Tani është koha për të ulur tensionet" tha Sekretari i Përgjithshëm i Kombeve të Bashkuara Antonio Guterres në Këshillin e Sigurimit, në takimin urgjent të thirrur të dielën, pas sulmit. Zëvendës ambasadori i SHBA-së në OKB Robert Ëood i bëri thirrje këshillit që të dënojë pa mëdyshje sulmin e Iranit. "Më lejoni të jem i qartë: nëse Irani ose përfaqësuesit e tij ndërmarrin veprime kundër Shteteve të Bashkuara ose veprime të mëtejshme kundër Izraelit, Irani do të konsiderohet përgjegjës," tha ai. Megjithatë, Biden i tha Netanyahut se SHBA nuk do të marrë pjesë në asnjë kundërsulm izraelit kundër Iranit pas sulmit, tha një zyrtar i Shtëpisë së Bardhë. Shteti amerikan Antony Blinken dhe Sekretari i Mbrojtjes Lloyd Austin folën gjithashtu me homologët e tyre në Arabinë Saudite, Turqi, Egjipt dhe Jordani, duke theksuar nevojën për të shmangur përshkallëzimin, rëndësinë e një reagimi të koordinuar diplomatik dhe duke theksuar se SHBA do të vazhdojë të mbështesë mbrojtjen e Izraelit.