Departamenti amerikan i Shtetit ka reaguar për ka reaguar ndaj veprimeve të fundit të Qeverisë së Serbisë e cila të hënën miratoi ligjin për juridiksionin në Kosovë përmes të cilit, sipas ekzekutivit serb synohet “organizimi, juridiksioni dhe kompetencat e autoriteteve gjyqësore për ndjekjen e veprave penale të kryera në territorin e Kosovës”. Departamenti amerikan i Shtetit ka mbështetur qëndrimin e BE, se ky projektligj është shkelje e premtimeve dhe detyrimeve të Serbisë që kanë dalë nga dialogu mes dy vendeve. “Ne përsërisim mbështetjen e Qeverisë amerikane për integritetin territorial dhe sovranitetin e Kosovës në gjithë territorin e saj”, është shprehur DASH. Uashingtoni tha se dialogu për normalizimin e raporteve mes Kosovës dhe Serbisë, që ndërmjetësohet nga BE-ja, ka zhvilluar zgjidhje praktike që promovojnë të drejtat e qytetarëve të Kosovës, përfshirë serbët që jetojnë në veri të Kosovës.“Ne u bëjmë thirrje Kosovës dhe Serbisë që të zbatojnë, pa vonesa, zotimet që kanë bërë në Marrëveshjen e vitit 2023 për rrugën drejt normalizimit të raporteve, përfshirë themelimin e një asociacioni të komunave me shumicë serbe”, tha zëdhënësi i DASH-it. Më 28 tetor, Qeveria e Serbisë njoftoi miratimin e ligjit për juridiksionin që u jep kompetencë gjykatave dhe prokurorive serbe që të hetojnë krimet që ndodhin në territorin e Kosovës, pavarësisht shtetësisë së personave të përfshirë në këto krime.