Ambasada Amerikane në Prishtinë ka kritikuar aksionin e të mërkurës të autoriteteve të Kosovës, ku u mbyllen mbi 20 institucione paralele serbe në mbarë territorin e vendit. Përmes një reagimi të publikuar në rrjetet sociale, Ambasada e SHBA thotë se veprimet nxisin tensionet dhe ndikojnë negativisht te qytetarët serbë të Kosovës, si dhe minojnë aspiratat e vendit për t’iu bashkuar komunitetit euro atlantik. SHBA kërkon që këto çështje të menaxhohen përmes dialogut të lehtësuar nga BE-ja, në mënyrë që të avancojë normalizimin dhe integrimin e Kosovës si një demokraci moderne, multietnike, evropiane dhe të mbrojë mirëqenien e qytetarëve të saj. Deklarata sqaron se aksioni është ndërmarrë pa u këshilluar me SHBA, duke dobësuar besimin mes palëve dhe kufizuar aftësinë e ndërkombëtarëve për të ndihmuar Kosovën. Gjatë aksionit të së mërkurës janë mbyllur komunat paralele serbe në Prishtinë, Viti, Fushë Kosovë, Lipjan, Vushtrri, Novobërdë, Kamenicë, Obiliq, Rahovec e Skënderaj.