Ish-nënpresidentja Kamala Harris tha se nuk do të kandidonte për poste publike sepse sistemi është “i prishur”, ndërsa reflektoi mbi vendimin e saj për të mos kandiduar për guvernatore të Kalifornisë dhe foli për atë që e sheh si “kapitulim” nga ata që ishin të ngarkuar me ruajtjen e demokracisë gjatë mandatit të dytë të Donald Trump. Në intervistën e parë të ish-kandidates presidenciale, që nga humbja e zgjedhjeve, Harris foli për karrierën e saj si nëpunëse publike, duke vënë në dukje se kur ishte e re mendonte se njerëzit që duan të përmirësojnë ose ndryshojnë një sistem nuk duhet ta bëjnë këtë vetëm nga jashtë, por ta ndryshojnë atë edhe nga brenda. “Kjo ka qenë karriera ime dhe kohët e fundit mora vendimin që, të paktën për momentin, nuk dua të kthehem në sistem. Mendoj se sistemi është i prishur”, tha Harris. “Gjithmonë kam besuar se, sado e brishtë të jetë demokracia jonë, sistemet tona do të ishin mjaftueshëm të forta për të mbrojtur parimet tona më themelore, dhe mendoj tani se ato nuk janë aq të forta sa duhet të jenë”, shtoi Harris. “Për momentin, nuk dua të kthehem në sistem. Dua të udhëtoj nëpër vend. Dua të dëgjoj njerëzit. Dua të flas me njerëzit. Dhe nuk dua që marrëdhënia me ta të jetë transaksionale, ku unë të kërkoj votën e tyre.”