Tre drejtues aktualë dhe ish-drejtues të kompanisë Smartmatic, kompania e teknologjisë që ka fituar edhe dy tenderat për votimin dhe identifikimin elektronik në Shqipëri, po hetohen në Shtetet e Bashkuara të Amerikës për korrupsion dhe pastrim parash. Mes drejtuesve të Smartmatic që përballen me akuza është edhe vetë presidenti i kompanisë, Roger Pinate, sipas një njoftimi të Departamentit të Drejtësisë. Aktakuza u zbulua në gjykatën federale të Floridës. Prokurorët thanë në njoftimin për shtyp se aktakuza lidhet me dyshimet se kompania Smartmatic ka paguar Andres Bautista, ish-zyrtarin më të lartë zgjedhor në Filipine për të siguruar tenderin e ofrimit të makinerive të votimit dhe shërbimeve të tjera zgjedhore në zgjedhjet e vitit 2016. Nën hetim është edhe Bautista, sipas njoftimit për shtyp.