Ministri serb i mbrojtjes, Millosh Vucevic ka hedhur poshtë mundësinë që vendi i tij të ketë dërguar armë në Ukrainë. Agjencia e lajmeve reuters raportoi këtë të mërkurë se dokumentet sekrete të pentagonit, që përfunduan online, tregonin se serbia, i vetmi vend i rajonit që nuk ka vendosur sanksione mbi Rusinë për pushtimin e Ukrainës, ka pranuar të dërgojë armë në Kiev ose i ka dërguar tashmë ato. Por për Vucevic, i pari zyrtar serb që reagoi, e gjithë kjo është një gënjeshtër. “Është publikuar një gënjeshtër sipas të cilës, Serbia po i shet armë Ukrainës. Qëllimi i dikujt është padyshim që të destabilizojë vendin tonë dhe ta fusë atë në një konflikt në të cilin ne nuk do të marrim pjesë,” tha Vuçeviç për Reuters. “Ne i kemi mohuar këto gënjeshtra më shumë se një herë, dhe ja ku jemi duke e bërë përsëri. Serbia nuk i ka shitur, as nuk do t’i shesë armë palës ukrainase apo ruse dhe as vendeve që e rrethojnë atë konflikt”, shtoi ai.