Euro është zhvlerësuar në nivele rekord ndaj lekut. Sipas kursit zyrtar të këmbimit të Bankës së Shqipërisë, monedha e përbashkët europiane ka rënë në nivelin e 97.55 lekëve. Rënia sugjeron fluks të monedhës euro në ekonominë shqiptare si efekt i drejtpërdrejt i sezonit veror dhe rritjes së numrit të turistëve. Rënia mund të ishte edhe më e madhe nëse Banka e Shqipërisë nuk do të aplikonte politika agresive të ndërhyrjes në treg duke blerë euro. Ndërhyrja e fundit e saj ka qenë të hënën, që rezulton ndërhyrja e dhjetë për këtë vit në tregun valutor përmes ankandeve për blerje eurosh në shumat 5 deri në 10 milionë. Të dhënat zyrtare të Bankës së Shqipërisë tregojnë se në këto ankande, ofertat e mbërritura në Bankën e Shqipërisë tejkalojnë kërkesën e saj, duke sugjeruar se efekti i ndërhyrjeve në treg për të frenuar zhvlerësimin e euros janë të pamjaftueshme. Zhvlerësimi i euros ka efekt pozitiv në uljen e çmimeve të importeve, por prania e madhe e valutës në ekonomi zhvlerëson politikat monetare të Bankës së Shqipërisë për mbajtjen nën kontroll të inflacionit.