Policia e Kosovës ka sekuestruar këtë të martë armë, municion dhe mjete të tjera ilegale gjatë një kontrolli në një bodrum të një ndërtese, në Mitrovicë të Veriut. Sipas Policisë, kontrolli u bë pas denoncimit të qytetarëve. Autoritetet bëjnë me dije se pas kontrolleve janë gjetur dhe konfiskuar: tre armë të gjata, 764 fishekë të kalibrave të ndryshëm, 14 karikatorë, 10 krehër për fishekë, një granadë dore tymuese, dy antiplumba ushtarakë dhe veshje ushtarake. Rasti është njoftuar në Prokurorinë e Shtetit, ku është regjistruar për veprën penale: “Mbajtje në pronësi, kontroll ose posedim të paautorizuar të armëve”.