Presidenti serb, Aleksandar Vuçiç, tha se “Serbia është lodhur nga ata që po e terrorizojnë prej katër muajsh”, duke shtuar se qeveria e tij duhet të bëjë gjithçka që të shmangë dhunën, por po ashtu edhe të kundërshtojë ata që “shkatërrojnë” shtetin. “Po vlon në Serbi, por vetëm ata nuk e shohin këtë. Serbia është lodhur me ata që e kanë terrorizuar prej katër muajsh tashmë. Dhe ne duhet të bëjmë gjithçka që t’iu përgjigjemi atyre që po shkatërrojnë shtetin tonë”, tha Vuçiç në një video në Instagram. Ai shtoi se i fton njerëzit që të protestojnë në mënyrë paqësore dhe të tregojnë se ata duan një “Serbi të lirë”. Protestat masive kanë mbërthyer serbinë që pasi 16 persona humbën jetën si pasojë e shembjes së një strehe betoni në stacionin hekurudhor të Novi Sadit, më 1 nëntor. Protestat janë organizuar nga studentët, të cilët kanë bllokuar fakultetet prej më shumë se tre muajsh, duke kërkuar përgjegjësi për aksidentin.