Ministri i Jashtëm rus, Sergei Lavrov tha të hënën se me ministrin e Jashtëm serb, Marko Gjuriç kanë rënë dakord të vazhdojnë punën e përbashkët për të parandaluar dëmtimin e interesave të përbashkëta që kanë në Industrinë e Naftës së Serbisë, NIS. Më 10 janar, SHBA sanksionoi NIS për shkak se kompania është në pronësi të kompanisë ruse Gazprom Neft, me qëllim parandalimin e Rusisë që të shfrytëzojë të ardhurat nga energjia për të financuar luftën në Ukrainë. “Forca të caktuara në Perëndim nuk e duan bashkëpunimin tonë dhe po tentojnë të pengojnë bashkëpunimin tonë”, tha Lavrov në konferencën e përbashkët për shtyp me Gjuriç, i cili është në një vizitë dyditore në Moskë. Kompanitë ruse, Gazprom Neft dhe Gazprom, zotërojnë 56.15 për qind të aksioneve të NIS-it, ndërsa Serbia zotëron pothuajse një të tretën e aksioneve. Serbia, bashkë me Bjellorusinë, janë shtetet e vetme evropiane që nuk kanë vendosur sanksione ndaj Rusisë për luftën e nisur në Ukrainë. Ministri i Jashtëm serb, Marko Gjuriç ka thënë se bisedimet për NIS-in do të vazhdojnë dhe që presidenti serb, Aleksandar Vuçiç do të diskutojë këtë çështje edhe me zyrtarët rusë. “Gjëja më e rëndësishme është që shtetasit serbë të mos vuajnë nga sanksionet kundër NIS-it”, ka thënë ai. Industria e Naftës e Serbisë (NIS) ka nisur një kërkesë në Zyrën për Kontrollin e Aseteve të Huaja, që funksionon në kuadër të Thesarit amerikan, që të shtyjë afatin për zbatim të sanksioneve. Presidenti Vuçiç ka thënë se ai është ende në pritje të përgjigjes nga zyrtarët amerikanë, dhe që shtyrjen e sanksioneve e konsideron të nevojshme derisa të gjendet një zgjidhje lidhur me pronësinë e kompanisë. Pas takimit me Lavrovin, Gjuriç tha se Serbia është në rrugën evropiane, por do t’i ruajë marrëdhëniet me Rusinë. Serbia varet nga Rusia sa u përket furnizimeve me gaz natyror, ndërsa mbështetet tek moska edhe për të kundërshtuar pavarësinë e Kosovës në organizata ndërkombëtare. Serbia i ka përkrahur rezolutat e Kombeve të Bashkuara për integritet territorial të Ukrainës, por pavarësisht thirrjeve të Brukselit, nuk është distancuar nga Moska zyrtare.