Policia e Kosovës ndaloi 17 persona gjatë tubimit të serbëve në Gazimestan me rastin e festës së tyre të Vidovdanit. Të shoqëruarit, kryesisht të rinj nga Serbia dhe Bosnja janë ndaluar për sjellje provokuese. Disa prej tyre kishin fanela dhe banderola me mbishkrime si ‘Kosva është Serbi’, apo ‘Kosova është zemra e Serbisë’ . Katër prej tyre u lanë të lirë mënjehrë, ndaj disave u caktua masa e detyrimit për t’u paraqitur ndërsa për një pjesë, që nuk janë shtetas të Kosovës është vendosur dëbimi i tyre. Lista Serbe – partia më e madhe e serbëve në Kosovë – i ka dënuar ashpër këto ndalime. Vidovdani festohet tradicionalisht edhe nga Kisha Ortodokse Serbe, e cila kryen edhe rit fetar, si shenjë përkujtimi për ushtarët e vrarë në atë që njihet si Beteja e Kosovës në shekullin e 14-të. Në hapësirat ku është mbajtur organizimi ka pasur prezencë të madhe policore, përfshirë pjesëtarë të Njësisë Speciale të Policisë së Kosovës, ndërsa sigurinë e përforcuan edhe KFOR dhe Eulex, por që ndërhyrja e tyre nuk ishte e nevojshme.